Në Shqipëri, bashkë me afrimin e zgjedhjeve rriten edhe shpenzimet publike. Kjo prirje bëhet edhe më e dukshme ndër tenderat e mëdhenj të pushtetit lokal – ata që kalojnë vlerën 100 milionë lekë – ku shifrat e tenderuara janë kurdoherë më të mëdha në vitet zgjedhore përkundër viteve kur nuk ka zgjedhje. Këto verifikime mbështeten edhe nga analiza shkencore, monitorime të shoqërisë civile dhe dokumente të tjera. Në këtë mënyrë, ekspertët dhe aktivistët ngrenë shqetësime të bazuara që fondet publike po përdoren për të ndikuar votën.
