Pesë vite mbështetje për gazetarinë që kërkon llogaridhënie

Nga viti 2020 deri në vitin 2025, Investigative Network Albania – INA krijoi një hapësirë të dedikuar për gazetarinë investigative të pavarur, bashkëpunimin ndërmjet gazetarëve dhe mbështetjen e historive që kërkonin kohë, burime dhe pavarësi editoriale.

Programi u mbështet nga Ambasada e Shteteve të Bashkuara në Tiranë dhe u zbatua nga Qendra Shqiptare për Gazetari Cilësore, Instituti Shqiptar i Medias dhe Qendra FOL.

Qëllimi ishte i drejtpërdrejtë: të krijoheshin më shumë mundësi për gazetari që ekspozon abuzimin me pushtetin, rrit transparencën dhe kërkon llogaridhënie nga institucionet.

Një platformë për gazetarinë investigative

Në qendër të projektit ishte INA Media, një platformë e dedikuar për publikimin dhe shpërndarjen e gazetarisë investigative.

Ajo u shndërrua në një hapësirë për artikuj investigative, analiza, dokumentarë, hulumtime tematike dhe produkte të gazetarëve dhe organizatave partnere.

Temat e trajtuara përfshinë korrupsionin, qeverisjen, drejtësinë, ekonominë, çështjet sociale, mjedisin dhe probleme të tjera me interes publik.

Mbështetje për historitë që kërkojnë kohë

Një nga objektivat kryesore të INA ishte krijimi i mundësive për gazetarët që dëshironin të punonin mbi histori më të thelluara dhe të pavarura.

Programi mbështeti prodhimin e gazetarisë investigative dhe bashkëpunimin ndërmjet gazetarëve dhe organizatave mediatike, duke synuar rritjen e sasisë dhe cilësisë së përmbajtjes së pavarur investigative në Shqipëri.

Nga Shqipëria në redaksitë amerikane

Një ndër komponentët më të veçantë të INA ishte programi ndërkombëtar i praktikës profesionale për gazetarët e rinj.

Për katër vite, gazetarë të rinj shqiptarë morën pjesë në një program trajnimi dhe praktike profesionale në zonën e Bostonit, ku u njohën nga afër me punën e redaksive amerikane.

Programi u fokusua te gazetaria investigative, etika në media, gazetaria e të dhënave dhe prodhimi multimedial dhe krijoi një komunitet prej më shumë se 30 alumni.

Projekti përfundoi. Rrjeti mbetet.

INA përfundoi në vitin 2025, por jo gjithçka që u ndërtua bashkë me të.

Arkiva e INA Media, hulumtimet e publikuara, bashkëpunimet e krijuara dhe komuniteti i gazetarëve të përfshirë mbeten pjesë e trashëgimisë së programit dhe e eksperiencës investigative të ACQJ-së.

Për ACQJ-në, INA dëshmoi se gazetaria investigative ka nevojë jo vetëm për gazetarë të mirë, por edhe për kohë, burime, bashkëpunim dhe hapësirë editoriale të pavarur.