Rekord gjobash pas ndryshimeve të Kodit Rrugor – Aksidentet nuk ulen pavarësisht arkëtimit prej 28 milionë eurosh në një vit

Ashpërsimi i ndëshkimeve për shoferët po shërben për të mbushur arkën e shtetit. Gjatë vitit të kaluar gjobat u katërfishuan, por numri i aksidenteve u rrit me 20% duke vënë në pikëpyetje efektshmërinë e kësaj politike. Disa punonjës të policisërrugore thanë për “INA Media” në mënyrë konfidenciale se eprorët i kanë urdhëruar verbalisht për vendosjen e një minimumi prej 30 gjobash në ditë, në të kundërt u tërheqin vërejtje.

Emirjon Senja

Ashpërsimi i Kodit Rrugor ka sjellë një rritje të ndëshkimeve ndaj drejtuesve të automjeteve, duke e katërfishuar vlerën e gjobave, por pa ndikuar në uljen e numrit të aksidenteve rrugore. Të dhënat e siguruara nga Policia e Shtetit tregojnë se vlera totale e gjobave arriti në 28 milionë euro për vitin 2023, një rritje e ndjeshme krahasuar me vitet e mëparshme.

Megjithatë, statistikat tregojnë se numri i aksidenteve rrugore gjatë të njëjtës periudhë jo vetëm që nuk ka rënë, por është rritur me 20%. Situata është veçanërisht shqetësuese për shkak të politikave të aplikuara, ku gjobat duket se shërbejnë më shumë për mbushjen e arkës së shtetit sesa për përmirësimin e sigurisë rrugore.

Policia Rrugore po zbatojnë urdhra verbalë për të vendosur një numër minimal gjobash në ditë, një praktikë që ngre pikëpyetje mbi etikën dhe efektivitetin e masave ndëshkimore. Në disa raste, radari automatik dhe ndryshimet e papritura të kufizimeve të shpejtësisë janë kthyer në burim të ndëshkimeve masive, veçanërisht në zona si hyrja e Vlorës dhe akset kryesore të vendit.

Sistemi i ashpërsuar i penaliteteve nuk është mbështetur nga përmirësime në infrastrukturë apo nga masa edukative. Ekspertët e sigurisë rrugore theksojnë se ndëshkimet e njëanshme nuk mund të japin rezultat pa një qasje të integruar që përfshin edukimin e drejtuesve të mjeteve dhe investimet në infrastrukturën rrugore.

Gjetjet kryesore të hulumtimit:

Gjobat e rrugores u katërfishuan nga 6.7 milionë euro në 2020 në 28 milionë euro në 2023.
Numri i aksidenteve gjatë vitit 2023 u rrit me 20% krahasuar me vitin e kaluar, duke sjellë mbi 190 viktima.
Urdhra verbalë për vendosjen e një minimumi prej 30 gjobash në turn nga Policia Rrugore.
Përmirësimet e infrastrukturës dhe këshillimi, të premtuara pas ndryshimeve të Kodit Rrugor, kanë mbetur në letër.
Ekspertët sugjerojnë një strategji të integruar me gjoba të drejta, edukim dhe investime për uljen e aksidenteve.

Për më shumë detaje mbi ndikimin e gjobave dhe shifrat alarmante të aksidenteve, lexoni artikullin e plotë: https://ina.media/2024/12/10/rekord-gjobash-pas-ndryshimit-te-kodit-rrugor-28-milione-euro-ne-nje-vit-por-aksidentet-vijojne-njelloj/