Denada Jushi
Rastet kur SPAK ka arritur të vërë para ligjit zyrtarë policie që bashkëpunojnë me krimin e organizuar kanë qenë jo të pakta, duke nxjerrë në dritë një fenomen të rrezikshëm: deri ku krimi arrin të depërtojë.
I.H ishte oficer i Antiterrorit, dhe detyra e tij ishte zbulueshmëria e krimit, por arrestimi nga SPAK ditën e enjte, në kuadër të një operacioni të gjerë të realizuar në bashkëpunim me autoritetet italiane, tregoi se ky oficer në fakt i shërbente krimit e jo policisë. Në momentin e ekzekutimit të urdhrit, Haxhiaj ndodhej në ambientet e Akademisë së Policisë, ku ishte i angazhuar në një kurs tremujor specializimi për Antiterrorin.
Një tjetër rast ku oficerë të policisë bëhen palë me krimin ishte atentati ndaj Gilmando Danit, që u ekzekutua pranë aeroportit të Rinasit, ndërsa shofer i automjetit luksoz ishte Muçi Shaljani, agjent i AMP-së, i cili ndërroi jetë pak orë më vonë.
Të ngjashme ishin edhe rastet që lidhen me Ervis Martinaj. Ky i fundit ndihmohej nga agjenti i operacionales, Jeton Lami.
Raste të tjera janë nxjerrë nga dosjet e njohura si “Metamorfoza” apo përmes përdorimit të SKY/ECC. Një prej tyre ishte Oltion Bistri, ish-shefi i Forcës Operacionale. Dritan Metaj, ish-shefi i policisë së Kurbinit, u arrestua në tetor 2023 me akuzën e dhënies së ndihmës ndaj një grupi kriminal për të shmangur arrestimin. Emra të tjerë si ish-zv.drejtori i Policisë së Shkodrës, ish-drejtori i Policisë së Lezhës apo ish-punonjësi i Policisë së Durrësit tregojnë sërish bashkëpunimin e zyrtarëve të lartë të policisë me krimin e organizuar, nga mbrojtja te kalimi i informacionit.
Këtë shqetësim e ka ngritur disa herë kreu i SPAK, Altin Dumani, i cili ka deklaruar se marrëdhënia e bashkëpunimit me policinë shpesh është e pabesueshme.
“Në raste të caktuara, sidomos ato të krimit të organizuar, nuk bashkëpunojmë dot me policinë sepse na rezulton se ka policë të përfshirë, dhe kjo në nivele të larta,” është shprehur Altin Dumani në raportimin vjetor para Këshillit të Lartë të Prokurorisë, duke theksuar se goditja e efektivëve të policisë së shtetit në këto raste është thelbësore.
Ky fenomen është shqetësues, pasi kur krimi arrin të depërtojë brenda strukturave që duhet ta luftojnë, zbulohet sa të rrezikuar janë vetë kolegët që kryejnë veprimet konform ligjit. Këta zyrtarë të implikuar rrezikojnë punën e prokurorëve dhe gjyqtarëve që hetojnë e gjykojnë krimin, por mbi të gjitha rrezikojnë qytetarët, të cilët teorikisht duhet të kërkojnë mbrojtje tek policia, e jo të trokasin te kriminelët për mbrojtje. /acqj.al
